1Cor 3 | MED | STEP | Angmᵾn! Na enim kᵾn unt omp ik nᵾmp ngur ni, Muⱡnga tepa mul wamp mbᵾ kᵾn, ik nᵾt ei mel, ni nᵾndᵾt mon! Enim kᵾn ik nit ei, enim mbo wamp rᵾⱡaip mbᵾ mel molk, Kraist nga uⱡ tetᵾm mbila, mondᵾk pᵾtmin uⱡ ei, kangambuⱡa kel mel moⱡᵾngina, kandᵾp nit.

1 Corinthians 3

Got Nga Kongun Kindmant Wamp

1 Angmᵾn! Na enim kᵾn unt omp ik nᵾmp ngur ni, Muⱡnga tepa mul wamp mbᵾ kᵾn, ik nᵾt ei mel, ni nᵾndᵾt mon! Enim kᵾn ik nit ei, enim mbo wamp rᵾⱡaip mbᵾ mel molk, Kraist nga uⱡ tetᵾm mbila, mondᵾk pᵾtmin uⱡ ei, kangambuⱡa kel mel moⱡᵾngina, kandᵾp nit. 2 Enim rᵾng ronduⱡ mat ngui nganggᵾp, aim mint ngur. Ei nambuⱡ emel, enim rᵾng ronduⱡ mat nuing ei nga, kapⱡa mon itim ila, kandᵾp it. Wote, akup ui ila kep, enim rᵾng ronduⱡ nuing ei nga, tᵾk kun etᵾk, muⱡi nambᵾrmᵾn ku. 3 Ei nambuⱡ emel, enim mᵾi kona wamp rᵾⱡaip pek mormin ei mel ku mormin. Enim nga ruk ting ila, wamp ti kᵾn, ik mura iti uⱡ na, wᵾlᵾk rui uⱡ mbᵾ etᵾk ku mormin. Uⱡ etmin mbᵾ ndi, enim Got nga wamp mel mon, enim mᵾi kona wamp mendpᵾⱡ ralk mormin. 4 Ei nambuⱡ emel, enim nga ruk ting ila, wamp ti ndi, nimba mel, “Na Pol kᵾn mor,” nitim. I nilinga, wote wamp ti ndi, nimba mel, “Na Apolus kᵾn mor,” ninim. Uⱡ ei ndi, ora ndupa, enim mᵾi kona wamp mendpᵾⱡ kᵾⱡ, mormin mel enim.

5 Ei kᵾn, Apolus ei wu nam? Wote, Pol ei wu nam? Tᵾl Got nga kongun kindmant wu mendpᵾⱡ raⱡ. Got ndi, kongun elpa elpa, tᵾl kᵾmp tᵾpa ngurum ei mel, enim kᵾn elimbuⱡa enim. Got kᵾn mondᵾk pᵾtᵾng. 6 Na ndi, rᵾng mbo mundᵾr. Wote Apolus ndi, nu ngurum. Wote, Got elim ndi, rᵾng kᵾⱡ etpa ou endᵾtᵾm. 7 Rᵾng rarum wu ei kep, nu mundrum wu ei kep, wu raⱡ nga kongun ei nga ronduⱡ ei, mana mel, Got ndi, rᵾng elinga, ou etᵾm uⱡ ei, uⱡ ingk. 8 Rᵾng mbo mondrum wu ei kep, nu mundrum wu ei kep, wu raⱡ nga kongun etmbil raⱡ, kapⱡa mint. Got ndi, wu raⱡ nga elpa elpa kongun etmbil ei mel, kai mat nit ila, mel kai mat punt ropa ngumba. 9 Enim Got nga kongun kona moⱡina, tᵾl Got nga kongun endinmbᵾⱡ. Wu raⱡ enim wamp kᵾⱡ, Got nga manga ei mormᵾn.

10 Got ndi, na memp kai ti ngurum ila tep moⱡᵾp, manga mam mbᵾ, rakpa tᵾpa, mindi wu ni mel, manga ronduⱡ mba moⱡmba, kongun kuimp tepa ku pol ei, na ndi tit. Wote, ku pol etᵾp tit ila wu mat ndi, manga raknᵾmᵾn. Wu elpa elpa ok, manga ei, rakᵾk oⱡa ting ei, unt wu ei, rakpa mondum ei mel ku, kandpa pilpa kongundpa rakᵾpa oⱡa tangga! 11 Nambuⱡ emel, Got ndi, manga ronduⱡ mba moⱡmba kongun kuimp tepa ku pol iti uⱡ ei, Jisas Kraist etpa mundrum. Manga ku pol ronduⱡ ei, Kraist elim tenda waⱡᵾm ei morum. Ei nga, nombuⱡa mam elpa tila ku pol ronduⱡ etᵾk, Got nga manga ei rᵾking mel mon. 12 Ei nga, wamp mat ndi, ku gol na, silpa na, ku eng nui kai mat tᵾk ku pol ila rᵾking. Wamp mat ndi, nde na, ᵾngᵾmp na, tᵾmbᵾⱡ na mel mbᵾ, tᵾk manga rᵾking ei nga ku pol ila ku rᵾking. 13 Wamp tenda tenda ei nga kongun em ei nga, eng nom nit ei, wakᵾt Kraist nga Ui Ou ei kᵾn, tᵾpa mot ndangga kᵾnmin. Ui Ou ila ndip ei ndi, wamp elpa elpa mbᵾ nga kongun eng nit mbᵾ, tᵾpa mot ndumba. Ndip ei ndi nangga, kongun ei nga ronduⱡ ei nangga, ui ou ila kandᵾp mbi nduimin. 14 Wamp ti nga manga ku pol ronduⱡ ila rakᵾm ei, ndip ei ndi, nui nanᵾm ndam, Got ndi, wamp ei mel kai ti, punt ropa wei gem ngumba. 15 Wote, wamp ti nga manga rakum ei, ndip ei ndi, nomba pora ndum ndam, wamp ei, elim mel wei gem ti natᵾmba. Ei wote, wamp ei, elim kont moⱡmba. Moⱡpa kᵾn, elim ndi, ndip anmbil mam ei ndi, nomba pora ndom ti ont, nimba pilmba.

16 Enim Got nga manga wingti, wote Got nga Muⱡnga ei, enim kᵾn rukᵾr orunga morum, ni pili napᵾtmᵾn ye! 17 Ei nga, wamp nam ti ndi, Got nga manga wingti ei, etpa kit mondum ndam, Got ndi, wamp ei etpa kit mondᵾmba ku. Ei nambuⱡ emel, Got nga manga ei wingti, wote enim wamp kᵾⱡ, elim nga manga wingti mbᵾ.

18 Wamp ti ndi, el elim tᵾpa wᵾlᵾ mundi nᵾmᵾndangga. Wote enim nga ruk ting ila wamp ti ndi, elim mᵾi kona uⱡ mbᵾ nga pilpa kungᵾndi tep mor nimba pilim ndam, elim mᵾi kona uⱡ mbᵾ nga numan mbo kai pi nᵾpi wamp rᵾⱡangga! Wote wamp ni, pilpa kungᵾndi kai pindi wamp raⱡmba. 19 Ei nga, ya mᵾi kona wamp mbᵾ ndi, pilpa kungᵾndi ronduⱡ mat nᵾk pᵾnmin mbᵾ, Got ndi tᵾpa pei mundrum. Buk Wingti ei ndi, nimba mel,

“Wamp ti ndi, el elim pilpa kungᵾndi ronduⱡ tep mor nimba pᵾtᵾm ila, Got ndi, en enim nga uⱡ ⱡawa etmin ila imp morum,” nᵾtᵾm.
20 Wote, Buk Wingti ila ik ti ndi, nimba mel,

“Wamp nga pilpa kungᵾndi numan rukrᵾng orunga mbᵾ, Got ndi, pilpa kandpa tᵾpa pei mundrum,” nᵾtᵾm.
21 Ei nga, enim nga ruk ting ila, wamp ti nga mbi mek oⱡa pi nᵾpᵾi. Mel mbᵾ pora, enim nga mint tetᵾm. 22 Wu Pol kᵾn, Apolus kᵾn, Pita kᵾn kep, ya mᵾi kona mel mbᵾ kep, kont mul uⱡ ei kep, wamp kᵾⱡi uⱡ ei kep, akup ui ila muna, wote moⱡpᵾn mbin uⱡ mbᵾ pora, enim nga mint. 23 Enim Kraist nga wamp kᵾⱡ, wote Kraist ei Got nga.